ރާއްޖޭގައި ފުރަތަމަ ފަހަރަށް އިލެކްޓްރޯނިކް ޕެޓިޝަން ސިސްޓަމް (އީ-ޕެޓިޝަން ޕޯޓަލް) މިއަދު އިފުތިތާހު ކޮށްފި އެވެ.
ރައްޔިތުންގެ މަޖިލީހުން ބުނީ މިއީ އެ އިދާރާގެ މަސައްކަތްތައް ޑިޖިޓަލައިޒް ކުރުމަށާއި، ޑިމޮކްރެޓިކް ނިޒާމުގެ ތެރެއިން ރައްޔިތުންގެ ބައިވެރިވުން ހަރުދަނާކުރުމަށް އެޅުނު ތާރީހީ ފިޔަވަޅެއް ކަމަށެވެ.
މި ޕޯޓަލް މެދުވެރިކޮށް ޕެޓިޝަން ހުށަހެޅުން ޑިޖިޓަލް ކޮށްފައިވާއިރު، ރައްޔިތުންނަށް އޮންލައިންކޮށް ޕެޓިޝަން ހުށަހެޅުމާއި، ހުށަހަޅާފައިވާ ޕެޓިޝަންތަކުގެ މަސައްކަތް މަޖިލީހުގައި ކުރިއަށްދާ ގޮތުގެ އަދާހަމަ މައުލޫމާތު ލިބުމުގެ ފުރުސަތު ލިބިގެންދާނެ އެވެ. މި ޕޯޓަލްގައި ސޮއި ކުރުމާއި، ސޮއިކުރާ ފަރާތްތަކުގެ ސއްހަކަން ކަށަވަރު ކުރާނީ 'އީ-ފާސް' މެދުވެރި ކޮށެވެ.
ރައްޔިތުންގެ މަޖިލީހުން ބުނީ މި ޕޯޓަލްގެ ސަބަބުން، ޕެޓިޝަނެއް ހުށަހެޅުމުގައި ރައްޔިތުންގެ މަޖިލީހުގެ މެންބަރުންނަށް ބަރޯސާވުން ކުޑަކުރެވި، ރާއްޖޭ ކޮންމެ ހިސާބެއްގައި ހުންނަ ރައްޔިތަކަށް ވެސް ފަސޭހަކަމާ އެކު ޕެޓިޝަން ހުށަހެޅޭނެ ކަމަށެވެ.
މީގެ އިތުރުން ޕެޓިޝަނަކަށް ސޮއި ލިބޭ މިންވަރަށް ބަލައި، ރައްޔިތުންގެ މަޖިލީހުގެ މަސައްކަތުގެ ދާއިރާގެ ތެރެއިން އެޅުމަށް ލާޒިމުވާ ފިޔަވަޅުތައް މި ނިޒާމުގެ ތެރެއިން ތައާރަފު ކުރެވިފައިވާ ކަމަށް ވެސް އެ އިދާރާއިން ބުނެފައިވެ އެވެ.
ކޮމެންޓް