ހިތަދޫ ވިޔަފާރި ބަނދަރުގައި ޑިއުޓީ ފްރީ ޒޯނެއް ތަރައްގީ ކުރުމުގެ މަސައްކަތާއި، ބޮންޑެޑް ވެއާހައުސްގެ ހިދުމަތާއި، ބަލްކް ކާގޯ ފެސިލިޓީ ގާއިމުކޮށް، އެ ހިދުމަތްތައް މިއަދުން ފެށިގެން ދޭން ފަށައިފި އެވެ.
މިއަދު ހަވީރު ހިތަދޫ ވިޔަފާރި ބަނދަރު ސަރަހައްދުގައި މިކަމަށް ޓަކައި ބޭއްވި ހާއްސަ ރަސްމިއްޔާތެއްގައި މި ބޮންޑެޑް ޒޯން އިފްތިތާހު ކޮށްދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
މިއަދު ހިތަދޫ ވިޔަފާރި ބަނދަރުގައި އަލަށް ތައާރުފު ކުރެވުނު ހިދުމަތްތަކުގެ ތެރޭގައި، ކާބޯތަކެތީގެ މައިގަނޑު ބާވަތްތަކާއި އަސާސީ މުދާ އަދި އިމާރާތް ކުރުމަށް ބޭނުންވާ ހިލައާއި ހިލަވެލި ފަދަ ތަކެތި ބަލްކްކޮށް، ޑިއުޓީއާ ނުލައި ރައްކާ ކުރެވޭނެ ބޮންޑެޑް ސަރަހައްދެއް ގާއިމު ކުރުން ހިމެނެ އެވެ. މީގެ އިތުރުން، ބޮންޑެޑް ވެއާހައުސްގެ ހިދުމަތް ފެށުމާއި، މުދާ ބެހުމަށް ލުއިފަސޭހަ ކޮށްދިނުމުގެ ގޮތުން ޑޮމެސްޓިކް ވިޔަފާރިވެރިންނަށް ހާއްސަ މުދާ ބާލާ ސަރަހައްދެއް ގާއިމު ކުރާނެ އެވެ.
އެމްޕީއެލުން ބުނީ ބޮންޑެޑް ވެއާހައުސްގެ ސަބަބުން ވިޔަފާރިތަކުގެ ލޮޖިސްޓިކްސް ހަރަދުތައް ކުޑަވެ، ދެކުނުގެ އަތޮޅުތަކަށް މުދާ ފޯރުކޮށްދިނުމުގެ ނިޒާމު އިތުރަށް ހަރުދަނާވެ، ރާއްޖޭގެ އިގުތިސާދު ސިންދަފާތުކޮށް ވިލުންވެރިކަން އިތުރުކުރުމަށް ރައީސް ޑރ. މުހައްމަދު މުއިއްޒު ގެންގުޅުއްވާ ތަސައްވުރު ހަގީގަތަކަށް ހެދުމަށް މަގުފަހިވާނެ ކަމަށެވެ.
އަދި މިއީ އައްޑޫ ސިޓީ އާއި ދެކުނުގެ ސަރަހައްދުތަކުގެ ތަރައްގީގައި އައްޑޫގެ ދައުރު ފުޅާ ކުރުމަށް އެޅުނު މުހިންމު ފިޔަވަޅެއް ކަމަށާއި މިއީ ދެމެހެއްޓެނިވި ތަރައްގީއަށާއި، ކާނާގެ ރައްކާތެރިކަން ކަށަވަރު ކުރުމަށާއި، ވިޔަފާރީގެ ފުރުސަތުތައް މުޅި ރާއްޖެއަށް ފުޅާ ކުރުމަށް ސަރުކާރުން ދޭ އިސްކަން ހާމަކޮށްދޭ މަޝްރޫއެއް ކަމަށް ވެސް އެމްޕީއެލުން ބުނެ އެވެ.
ކޮމެންޓް