ތެދު ހަބަރާއި މައުލޫމާތު ފޯރުކޮށްދޭ ޒިންމާދާރު މީޑިއާއެއް އޮތުމަކީ ރައްޔިތުންގެ ހައްގެއް: ރައީސް

ސައްތައިން ސައްތަ އިސްލާމީ މުޖުތަމައެއްގައި ހިފަހައްޓަން ޖެހޭނޭ މިންގަނޑުތައް އަބަދުމެ ހިފަހައްޓަމުން، ފަސް ކާފު ހަމަ، ތެދު ހަބަރާއި މައުލޫމާތު ރައްޔިތުންނަށް ފޯރު ކޮށްދޭ ޒިންމާދާރު މީޑިޔާއެއް އޮތުމަކީ ރައްޔިތުންގެ ހައްގެއް ކަމަށް ރައީސް ޑރ. މުހައްމަދު މުއިއްޒު ކަމުގައި ވިދާޅުވެއްޖެ އެވެ.

ރިޔާސީ ބަޔާން އިއްވަމުން އެ މަނިކުފާނުގެ ވާހަކަފުޅުގައި، މި ސަރުކާރުން، ރައްޔިތުންގެ މި މުހިންމު ހައްގު ކަށަވަރު ކޮށްދިނުމުގައި ސާބިތުވެ ދެމި އޮންނާނެކަމުގެ ޔަގީންކަންދެއްވި އެވެ.

ރައީސްގެ ވާހަކަފުޅުގައި، ގައުމުގައި ހަމަޖެހުން ގާއިމްވެގެން ދިޔުމުގައި އަދި، ތަރައްގީ ގެ ދުވެލި ރައްޔިތުންނަށް ހާމަކޮށްދިނުމުގައި، އަދި ރައްކާތެރިކަން ރައްޔިތުންނަށް ކަށަވަރުކޮށްދިނުމުގައި ހަރުދަނާ މީޑިއާއެއް ގައުމުގައި ގާއިމްވެފައި އޮތުމަކީ ނުހަނު މުހިއްމު ކަމެއްގެ ގޮތުގައި ވަނީ ފާހަގަ ކުރައްވާފަ އެވެ.

އެ މަނިކުފާނުގެ ރައީސުލްޖުމްހޫރިއްޔާގެ ވާހަކަފުޅުގައި މި ސަރުކާރުން މީޑިއާތަކަށް ފަހި މާހައުލެއް ގާއިމުކޮށްދެއްވުމަށް ކުރައްވަމުންގެންދަވާ ބައެއް މުހިންމު މަސައްކަތްތަކުގެ މައްޗަށް އަލިއަޅުއްވާލައްވާފައިވެ އެވެ.

އެގޮތުން، ރާއްޖޭގެ ތާރީހުގައި އަލަށް، ދައުލަތުގެ ބަޖެޓުން މީޑިއާތަކަށް ފައިސާ ދޫކޮށްފައިވަނީ މި ސަރުކާރުގައިކަން އެ މަނިކުފާނު ފާހަގަ ކުރެއްވި އެވެ. އެގޮތުން ސަރުކާރުން މިހާރު ވަނީ 40 މީޑިއާއަކަށް 27،295،532.69 ރުފިޔާ ދޫކޮށްފަ އެވެ.

ރައީސް ޑރ. މުއިއްޒުގެ ވާހަކަފުޅުގައި، މީޑިޔާތަކުން ބޮޑު ކުލީގައި އޮފީހާއި ސްޓޫޑިއޯ ޖާގަ ކުއްޔަށް ނަގަން މަޖުބޫރުވެފައިވާތީ، މާލީގޮތުން ކުރިމަތިލާންޖެހިފައި އޮންނަ މި ދަތި ހާލަތުން އަރައިގަނެ، ލިބޭ އާމްދަނީ އިން މީޑިއާ އިތުރަށް ތަރައްގީކޮށް ކުރިއަރައިގެން ދިޔުމަށް މަގުފަހި ކޮށްދިނުމުގެ ގޮތުން، ވަރަށް ކުޑަ އަގެއްގައި ކުއްޔަށް ނެގޭނޭ އޮފީސް އަދި ސްޓޫޑިއޯ ޖާގަ ހިމެނޭ މީޑިއާ ވިލެޖްގެ މަސައްކަތް ވަރަށް ހަލުއި ދުވެލީގައި ކުރިޔަށްދާކަން ހާމަ ކުރެއްވިއެވެ.

އަދި ހުޅުމާލޭގެ ފޭސް 1 ގައި ހަދަމުންދާ މި މީޑިއާ ވިލެޖް ގައި 34 ޖާގަ ހިމެނޭނެކަމަށާއި މިތަން ނިމި، މީޑިއާތަކަށް މިތަނުގެ ބޭނުން ހިފުމުގެ ފުރުސަތު މި އަހަރުގެ މެދު ތެރޭގައި އިރާދަކުރެއްވިއްޔާ ހުޅުވާލެވޭނެކަމުގައި ރައީސް ވިދާޅުވި އެވެ.