އެކި ދާއިރާތަކުން ރާއްޖެއަށް ނިއުޒިލެންޑުން މެދުކެނޑުމެއް ނެތި ފޯރުކޮށްދެމުންދާ އެއްބާރުލުމާއި އެހީތެރި ކަމަށް ރައީސް ޑރ. މުހައްމަދު މުއިއްޒު ޝުކުރު އަދާކުރައްވައިފި އެވެ.
އެމަނިކުފާނު ވަނީ ނިއުޒީލެންޑްގެ ވައިޓެންގްއީ ޑޭގެ މުނާސަބަތުގައި އެ ގައުމުގެ ގަވަނަރު ޖެނެރަލް އޮފް ނިއުޒީލަންޑް، ނިއުޒީލަންޑް އޯޑާ އޮފް މެރިޓް (ޖީއެންޒީއެމް)، (ކިއުއެސްއޯ) ޑޭމް ސިންޑީ ކީރޯ އަށާއި، ނިއުޒީލަންޑްގެ ބޮޑުވަޒީރު ކްރިސްޓޮފާ ލަކްސޯންއަށް ތަހުނިޔާ ފޮނުއްވާފަ އެވެ.
ނިއުޒީލަންޑްގެ ގަވަރުނާ ޖެނެރަލަށް ރައީސް ފޮނުއްވި ސިޓީފުޅުގައި "ޓްރީޓީ އޮފް ވައިޓަންގްއީ"ގެ އަސާސްތައް ކަމަށްވާ އެއްބައިވަންތަކަމާއި، އެކުވެރިކަމާއި އިހުތިރާމް ކުރުމުގެ މައްޗަށް ބައްލަވާލައްވާފައިވެ އެވެ. އަދި، މި އަސާސްތަކަކީ ނިއުޒީލަންޑްގެ ގައުމިއްޔަތު ބައްޓަންވެފައިވާ އަސާސްތަކެއް ކަމަށްވެސް އެ މަނިކުފާނު ފާހަގަ ކުރެއްވި އެވެ.
ރައީސް ވަނީ ރާއްޖެއާއި ނިއުޒީލަންޑާ ދެމެދު އޮތް އެކުވެރިކަމުގެ ބަދަހި ގުޅުން ފާހަގަ ކުރައްވައި، އެކި ދާއިރާތަކުން އެއްބާރުލުންދީ އެ ފަދަ ގުޅުންތައް އިތުރަށް ހަރުދަނާ ކުރުމަށް ރާއްޖެއިން ސާބިތުކަމާއެކު ދެމި އޮތް ކަމުގެ ޔަގީންކަން ދެއްވާފަ އެވެ.
ބޮޑުވަޒީރަށް ފޮނުއްވި ސިޓީފުޅުގައި ރައީސް ވަނީ ވޭތުވެދިޔަ 50 އަހަރުގެ ތެރޭގައި ދެ ގައުމުގެ ގުޅުން ތަރައްގީވެ، ގާތް ރަހުމަތްތެރިކަމެއް އުފެދިފައިވާކަން ފާހަގަ ކުރައްވާފައެވެ. އަދި، އެ ގައުމުން ރާއްޖެއަށް މެދުކެނޑުމެއް ނެތި ފޯރުކޮށްދެމުންދާ އެއްބާރުލުމާއި އެހީތެރިކަމަށް ޝުކުރު އަދާ ކުރައްވައި، އެ ގުޅުންތައް އިތުރަށް ހަރުދަނާވެގެންދާނޭ ކަމުގެ ޔަގީންކަން އެ މަނިކުފާނު ވަނީ ދެއްވާފަ އެވެ.
މީގެ އިތުރުން ރައީސް ވަނީ ގަވަރުނަރު ޖެނެރަލާއި ބޮޑުވަޒީރަށް ދުޅަހެޔޮ ސިއްހަތަކަށާއި، ތަނަވަސްކަމާއި އަމާންކަމަށް އެދިވަޑައިގެން، ނިއުޒީލެންޑްގެ ރައްޔިތުންނަށް ހެޔޮއެދުންތައް ފޮނުއްވާފަ އެވެ.
ނިއުޒިލޭންޑްގެ ފައުންޑިންގް ޑޮކިއުމެންޓް، "ޓްރީޓީ އޮފް ވައިޓަންގްއީ" ގައި ސޮއިކުރި ދުވަސް ފާހަގަކުރުމުގެ ގޮތުން، ކޮންމެ އަހަރެއްގެ ވެސް ފެބުރުވަރީ މަހުގެ 6 ވަނަ ދުވަސް، އެ ގައުމުން ފާހަގަ ކުރަނީ ވައިޓަންގްއީ ޑޭގެ ގޮތުގަ އެވެ.
ކޮމެންޓް